Satış artımı həm kiçik və gənc bizneslərin, həm də nəhəng brendlərin istədiyi şeydir. Hər kəs öz yolunu axtarır: bəzi üsullar işləyir və bəzi üsullar isə işə yaramır.
Şəxsi biznesinizdə satışları artırmağın yolları hansılardır? Satışda ən çox edilən səhvlər nələrdir? Satış strategiyası nədir və necə qurulmalıdır? Kiçik biznesdə uğurlu satışın sirləri nələrdir? Mesaj yazan var, ancaq alan yoxdur probleminin həlli nədən ibarətdir? Bu və bu kimi suallar, demək olar ki, irili-xırdalı bütün biznes sahiblərini və marketinq işçilərini zaman-zaman düşündürmüş və düşündürməkdədir.
Bu məqaləmizdə bu suallara cavab tapmağa çalışmış və satışlarları artırmağın 10 yolunu təqdim etmişik.
Mövzu başlıqları:
Hər şeydən əvvəl satışa təsir edən amilləri araşdırmaq lazımdır. Satışa təsir edən amilləri 3 başlıq altında qruplaşdırmaq olar:
- Xarici amillər
- Daxili amillər
- Şəxsi amillər
Xarici amillər
Bunlar biznesin təsir edə bilmədiyi aspektlərdir, lakin satışa təsir edə bilər. Xarici amillərə iqtisadi şərait, bazar meyilləri, siyasi şərait, sosial-mədəni dəyişikliklər və rəqabət daxildir. Məsələn, məzənnənin kəskin artması alıcılıq qabiliyyətini aşağı sala bilər.
Daxili amillər
Bunlar biznesin birbaşa təsir edə biləcəyi aspektlərdir. Bu kateqoriyaya qiymət, məhsul və ya xidmətin keyfiyyəti, müştəri xidməti səviyyəsi, marketinq və satış strategiyası, daxili proseslər və korporativ mədəniyyət daxildir. Müştəri dəstəyinin yaxşılaşdırılması, logistikanın optimallaşdırılması, yeni texnologiyaların istifadəsi – bütün bunlar gəliri artıra bilər.
Şəxsi amillər
Bunlar müştərilərlə birbaşa əlaqədə olan satış işçilərinin və ya digər işçilərin istedad və bacarıqlarıdır. Motivasiya, alıcı ilə əlaqə qurmaq bacarığı, təcrübə – bütün bu keyfiyyətlər işin nəticələrinə bilavasitə təsir göstərir. Satıcı məhsul və ya xidmət haqqında bacarıqla danışa bilirsə, müştərinin etirazlarına adekvat cavab verə bilirsə və məsləhət vermək üçün kifayət qədər biliyə malikdirsə, o, həmişə əməliyyatı uğurla başa vuracaqdır.
Bu amilləri başa düşmək və təhlil etmək sahibkarlara satışları artırmaq üçün effektiv strategiyalar qurmağa kömək edir. Onlar hansı sahələrdə işin təkmilləşdirilə biləcəyini və biznes proseslərini planlaşdırarkən hansı xarici şərtləri nəzərə almağın vacib olduğunu göstərir.
Satışların artırılması planı nədir və onu necə qurmaq olar?
Satışları artırmaq planı hər hansı bir iş üçün aktualdır. Satışları artırmaq planlarının vaxt çərçivəsinə görə təsnifatını nəzərdən keçirək:
1. Qısamüddətli planlar – adətən bir gün, bir həftə, bir ay üçün olur. Onlar işçiləri həvəsləndirmək və onların məhsuldarlığını artırmaq məqsədi daşıyır. Məsələn, bir məişət texnikası mağazasının meneceri satıcılara 5 əsas məhsul və 20 aksesuar satmaq üçün gündəlik hədəflər təyin edə və ayın sonunda planı yerinə yetirənlərə mükafat verilməsini təşkil edə bilər.
2. Orta müddətli planlar – rübdən bir ilə qədər olan dövrü əhatə edir və struktur dəyişiklikləri ilə əlaqələndirilir: çeşidin genişləndirilməsi, yeni texnologiyaların tətbiqi və ya yeni bazarların işə salınması.
3. Uzunmüddətli planlar – üç il və ya daha çox müddətə tərtib edilir, qlobal məqsədlərin qoyulması: öz brendinizin yaradılması, beynəlxalq genişlənmə və ya satış proseslərinin tam avtomatlaşdırılması və s. buraya daxildir.
Biznesdə satışları artırmağın 10 yolu
1.Satış qıfı
Alıcının məhsulunuzla ilk tanışlığından alışa kimi mərhələlərə bölünərək satış prosesini təşkil etməyə kömək edir. Məsələn, bir onlayn mağaza üçün bu, aşağıdakı ardıcıllıqla ola bilər: sosial şəbəkələr vasitəsilə diqqəti cəlb etmək, veb-saytda ətraflı məlumat vermək, abunə olmağı təklif etmək, abunə üçün endirim vasitəsilə satınalmaları stimullaşdırmaq və s.
2. rəqib analizi
Rəqiblərin hərəkətlərini öyrənməklə hansı satış üsullarının daha təsirli olduğunu anlaya bilərsiniz. Rəqibiniz kontent marketinqdən istifadə edirsə və uğur əldə edirsə, şirkətin sosial şəbəkələrindəki məzmununun keyfiyyətinə diqqət yetirin.
3. Gizli alıcılardan istifadə
Gizli alıcılar biznesin böyüməsinə mane olan xidmət problemlərini müəyyən edə bilərlər. Praktikada bir çox menecer mövcud boşluqlardan xəbərsizdir.
4. Kontekstli reklam
Bu, oxşar məhsullarla maraqlanan potensial alıcıları cəlb etmək üçün yaxşı üsuldur. Yəni əgər, məsələn, bir şəxs məsələn axtarış sistemində “Bakıda santexnika mağazası” yazıb sorğu veribsə və sizdə belə mağaza varsa, kontekstli reklam ona mağazanızı ünvan və unikal təkliflə təqdim edəcəkdir.
5. Əlavə satışlar
Artıq bir şeyi almış müştərilərə əlavə məhsul və ya xidmətlər təklif etmək ümumi qəbz məbləğini əhəmiyyətli dərəcədə artıra bilər. Məsələn, bir müştəri dam örtüyü üçün sifariş vermişsə, ona bərkidici (vint, mismar və s.) almağı təklif edin.
Rəqəmsal marketinqin ənənəvi marketinqdən 5 üstünlüyü
6. Əməkdaşların ixtisasartırması
Müştəri etirazlarının işlənməsi və tələbatlarının formalaşdırılması metodlarının suallar zənciri vasitəsilə öyrənilməsi satışların artırılması üzrə kursların verdiyi minimum biliklərdir.
7. Sosial media idarəçiliyi
Sosial şəbəkələrdə aktiv iştirak potensial və cari müştərilərlə birbaşa əlaqə yaratmağa kömək edir. Faydalı məzmunun müntəzəm paylaşılması şirkətin tanınmasına şərait yaradır.
8. Loyallıq proqramının inkişafı
Loyallıq proqramları müştəriləri endirimlər, bonuslar və ya hədiyyələr təqdim etməklə təkrar alış-veriş etməyə həvəsləndirir. Bu, təkcə köhnə müştəriləri əldə saxlamaq deyil, həm də yeni müştəriləri alış-veriş etməyə təşviq etməkdən ibarətdir.
9. Promo-aksiyalar
Müvəqqəti promo-aksiyalar müştərilərin axınını artırmağa kömək edəcək. Məsələn, öz pendir fabrikiniz varsa, məhsulun təqdim olunduğu mağazada bir pendir dequstasiyası keçirin. Bu, alıcılıq qabiliyyətini və satışları artıracaq.
10. CRM sisteminin tətbiqi
CRM sistemləri bir çox prosesləri avtomatlaşdırmağa imkan verir, məsələn, müştəri ilə əlaqəni, bütün əməliyyatların tarixini saxlayır və məhsulların anbardan mağazaya hərəkətini izləyir və s. Böyük həcmli məlumatlarla işi asanlaşdıran CRM aydın interfeysə və bir çox faydalı funksiyalara malikdir.
